ჯ. ხმელიძის ბენეფისი!

გაიმართა ლიგა-4-ის მე-14 ტურის შეხვედრები. "მარგვეთს" გასვლითი მატჩი ჰქონდა წალენჯიხაში, ადგილობრივ "სქურთან." წინა დღეს დასავლეთ საქართველოში კოკისპირული წვიმა მოვიდა. ამას დაემატა ისიც, რომ თამაშის დილას ცენტრალურ სტადიონზე წალენჯიხის "ივენტუსის" საფეხბურთო აკადემიის ბავშვებს უვარჯიშიათ, რამაც სათამაშო მინდორი ძალიან ცუდ მდგომარეობაში ჩააგდო (რასაც ვიდეო რეპორტაჟში იხილავთ). ბურთს მოედანზე გადაადგილება უჭირდა. შეხვედრის პირველი ნახევარი "მარგვეთის" სათამაშო და ტერიტორიული უპირატესობით წარიმართა. ისინი ბევრს უტევდნენ. სახიფათო მომენტები შექმნეს ჯ. ხმელიძემ, თ.დარსაველიძემ, კ. გოგობერიშვილმა, მაგრამ მასპინძლები თავს კარგად იცავდნენ. 32-ე წუთზე მოედნის ცენტრში ბურთს შ. ვარდოსანიძე დაეუფლა, მან სწრაფად მოძებნა გუნდის დირიჟორი ნ. გაჩეჩილაძე, რომელმაც გრძელი პასით შეტევაში დ. მარგველაშვილი ჩართო. მან ბურთი კარგად მიიღო, ორ მეტოქეს გაცდა, მაგრამ საჯარიმოს წინა ხაზის სიახლოვეს უხეშად მოცელეს. დაინიშნა ჯარიმა. ბურთთან ნ. გაჩეჩილაძე და ჯ. ხმელიძე მივიდნენ. ყველა ელოდა, რომ დარტყმას როგორც ყოველთვის გუნდის კაპიტანა ითავებდა, მაგრამ დარტყმა მოულოდნელად ჯ. ხმელიძემ შეასრულა და ისე ოსტატურად, რომ მეკარემ რეაგირებაც ვერ მოახერხა-0:1. მასპინძლებმა თამაში ცენტრიდან განაახლეს და თამაში შეტევის მარცხენა ფრთაზე გადაიტანეს. აქ ბურთს თ. კაკუშაძე დაეუფლა, მან ბურთი ცენტრალურ მცველს-ა. სულამანიძეს დაუგორა, მან კი წინ გრძელი პასი გააკეთა. ბურთზე ხელით ითამაშა წალენჯიხელმა ფეხბურთელმა. ჯარიმა სწრაფად გაათამაშა ჯ. ხმელიძემ. მან შეტევის მარცხენა ფრთაზე თ. დარსაველიძე მოძებნა, რომელმაც ასევე სწრაფად შეაყოლა ბურთი საჯარიმოში შეჭრილ ჯ. ხმელიძეს, რომელმაც შეტევა ერთი დარტყმით დააგვირგვინა შორეულ კუთხეში და მეკარეს შანსი არ დაუტოვა-0:2. დარჩენილ დროში "მარგვეთს" კიდევ მართებდა გოლების გატანა: 41-ე წუთზე "სქური" მცველები შეცდნენ და მეკარესთან პირისპირ ჯ. ხმელიძე დატოვეს, რომელიც მეკარეს კი გაცდა, მაგრამ შემდეგ სუსტად დაარტყა და ბურთს მცველი დაეუფლა. 44-ე წუთზე კ. გოგობერიშვილის ჩაწოდების შემდეგ, დაახლოებით 11მ-იანის ნიშნულიდან, ნახევრად ბრუნში თ. დარსაველიძე ურტყამდა, მაგრამ მეკარემ მოახერხა მოგერიება. ბოლო წუთზე კი წალენჯიხელმა ბ. კაკაჩიამ მეორე ყვითელი ბარათი მიიღო და მინდორი ნაადრევად დატოვა. მეორე ტაიმი ანალოგიურად დაიწყო. "მარგვეთი" უტევდა, "სქური" თავს იცავდა. სტუმრებს რამდენჯერმე შეეძლოთ ანგარიშის გაზრდა, განსაკუთრებთ აღსანიშნავია შ. ვარდოსანიძის მომენტი, რომლის თავური დარტყმა სულ ოდნავ აცდა მიზანს. თითქოს საშიშროება არსაიდან სჩანდა, სტუმართა ფეხბურთელები მოეშვნენ და სასჯელმაც არ დაახანა. 65-ე წუთზე მასპინძლებმა შეტევა მარცხენა ფრთიდან წამოიწყეს, საჯარიმოში ჩააწოდეს, მცველებმა საპირისპირო მხარეს მოიგერიეს, წალენჯიხელებმა კვლავ საჯარიმოში ჩააბრუნეს. აქ მცველებს შორის, მეკარის ბაქანთან, უმეთვალყურეოდ დარჩა ნ. ქუთათელაძე, რომელმაც თავური დარტყმით სხვაობა შეამცირა: 1-2. "მარგვეთი" თითქოს დაიბნა, მეტოქემ კვლავ შეუტია და 69-ე წუთზე, მარჯვენა ფრთიდან, საჯარიმოს გარედან და მახვილი კუთხიდან, წალენჯიხელმა რ. გულუამ ტყვიასავით გაისროლა და შორეულ მაღალ კუთხეში ულამაზესი გოლი გაიტანა: 2-2. ამით მასპინძლებს თითქოს ძალა გამოელიათ, "მარგვეთს" კი, პირიქით, მეორე სუნთქვა გაეხსნა. ისინი ბევრს უტევდნენ, 77-ე წუთზე ჯ. ხმელიძის დარტყმა ოდნავ აცდა მიზანს. 83-ე წუთზე კუთხური დაინიშნა "სქურის" კართან, ნ. გაჩეჩილაძის ჩაწოდება მეკარემ მოიგერია, მაგრამ პირდაპირ ჯ. ხმელიძეზე, რომელმაც გადმოვარდნილი ბურთი შეუჩერებლად დაარტყა, სტუმრები კვლავ წინ გაიყვანა და თვითონაც ჰექ-თრიქი შეასრულა: 2-3. 85-ე წუთზე მარცხენა ფრთაზე ბურთს ლ. ჩიხლაძე დაეუფლა, მან ბურთი მარჯვენა ფრთაზე ჯ. ხმელიძე მოძებნა, რომელმაც საჯარიმოში ი. მაღლაფერიძეს უპასა. მან კი მარცხნიდან შემოჭრილ ლ. ჩიხლაძეს დაუგორა, რომლის უძლიერესი დარტყმა ზემოდან გადაცდა კარს. 90-ე წუთზე მასპინძელთა კარში ჯარიმა დაინიშნა. ნ.გაჩეჩილაძის უძლიერესი დარტყმა ხარიხამ მოიგერია. 93-ე წუთზე მასპინზელთა კარში, მარჯვენა ფრთიდან, კუთხური დაინიშნა. ჯ. ხმელიძემ ბურთი ლ. ლიპარტელიანთან გაითამაშა, მან კვლავ ხმელიძეს დაუბრუნა, რომლის ჩაწოდებას საჯარიმოში ი. მაღლაფერიძე დაეუფლა, რომელმაც მარცხნივ უმეთვალყურეოდან დარჩენილ ა. სულამანიძეს უპასა. მანაც შანსი ხელიდან არ გაუშვა და მატჩის საბოლოო შედეგი დააფიქსირა: 2-4. ამ გამარჯვების შემდეგ"მარგვეთმა" სატურნირო ცხრილში მეორე ადგილზე გადაინაცვლა და ლიდერ "დიდუბეს" მხოლოდ ორი ქულით ჩამორჩება. I წრის ბოლო შეხვედრას "მარგვეთი" 2 ივლისს გამართავს და ხარაგაულში კიდევ ერთ პრედენდეტს, წყალტუბოს "სამგურალი-2"-ს უმასპინძლებს. თუ ყველაფერი კარგად წარიმართა, შეიძლება ჩვენმა გუნდმა პირველი წრე პირველ ადგილზე დაასრულოს. ვთხოვ ყველას, ვისთვისაც ძვირფასია "მარგვეთის" ბედ-იღბალი, მხარი დაუჭიროს საყვარელ გუნდს. მატჩი 6-ის ნახევარზე დაიწყება. წარმატება ვუსურვოთ ჩვენს ბიჭებს ამ მეტად მნიშვნელოვან შეხვედრაში.