გაიმართა ლიგა-4-ის I წრის ბოლო, მე-15 ტურის შეხვედრები. "მარგვეთმა" ხარაგაულში სატურნირო ცხრილში მე-5 ადგილზე მყოფ წყალტუბოს "სამგურალ-2"-ს უმასპინძლა. ეს ე.წ. "6 ქულიანი" შეხვედრა იყო. ჩვენი გუნდის გამარჯვების შემთხვევაში ქულებს შორის სხვაობა 10 ქულა ხდებოდა, დამარცხების შემთხვევაში კი-4 ქულა, ამიტომ წყალტუბოს გუნდმა მათ ხელთ არსებული და ჩემპიონატის დებულებით განსაზღვრული ყველა ბერკეტი გამოიყენა, რამაც საშუალება მისცა მინდორზე უმაღლესი ლიგის 5 ფეხბურთელი გამოეყვანა, ხოლო რამოდენა სხვაობაა უმაღლეს და მე-4 ლიგებს შორის, ყველასათვის ცნობილია. ყველაფერმა ამან გამოიწვია ის, რომ შეხვედრა მეტად დაძაბული გამოდგა. სტუმართა მაღალ კლასს "მარგვეთის" ფეხბურთელებმა არნახული თავდადება და თავგანწირული ბრძოლა დაუპირისპირეს. ისინი ისე მოქმედებდნენ მოედანზე, როგორც თავგადადებული გმირები. მატჩი ისე წარიმართა, რომ ტერიტორიულ უპირატესობას "სამგურალი" ფლობდა. ისინი ბურთს აკონტროლებდნენ (რაც ზემოთ აღნიშნული ფაქტის გამო მოსალოდნელი იყო), მაგრამ "მარგვეთი" თავს ჭკვიანურად იცავდა, მოწინააღმდეგეს ზონებს უკეტავდა და მეტოქეს საჯარიმოსთან მიახლოების საშუალებას არ აძლევდა. პირველ ტაიმში სულ თითზე ჩამოსათვლელი მომენტები შეიქნა. მე-3 წუთზე სტუმრებმა შეტევა მარჯვენა ფრთიდან განახორციელეს, რასაც ჩაწოდება მოჰყვა. ბურთი ზემოდან დაეცა ხარიხას და მოედანი დატოვა. 25-ე წუთზე, მარჯვენა ფრთაზე, ბურთს თ. კაკუშაძე ფლობდა. მან ბურთი წინ გაგზავნა, რასაც მცველი დაეუფლა. მასთან ბრძოლაში თ. დარსაველიძე ჩაერთო, მცველს ბურთი აართვა, კედელი გაითამაშა ჯ. ხმელიძესთან და დასარტყმელ პოზიციაში აღმოჩნდა, მაგრამ დარტყმა ძლიერი არ გამოუვიდა და გამოცდილმა მეკარე ლ. კუტალაძემ ბურთის აღება მოახერხა. 31-ე წუთზე ჩვენმა ცენტრალურმა მცველმა ა. სულამანიძემ ცენტრალურ რკალთან ბურთი აართვა სტუმართა ფეხბურთელს, სწრაფად მოძებნა ცენტრში შემოწეული თ. დარსაველიძე, რომელმაც ცენტრალურ მცველებს შორის ზონაში ბურთი ჯუმბერ ხმელიძეს შეაყოლა. ის ბურთს დაეუფლა, მცველებს გაცდა, მეკარესთან პირისპირ გავიდა. მეკარე მას ფეხებში ჩაუვარდა, ბურთი თითქოს მოიგერია, მაგრამ მას კვლავ ჯ. ხმელიძე დაეუფლა, კარისაკენ ზურგით მდგომი და ნახევრად ბრუნში კარში გადაგზავნა. მცველები შეეცადნენ კარის გადარჩენას, მაგრამ ეს ვერ მოახერხეს: 1-0. 35-ე წუთზე ნ. გაჩეჩილაძემ თ. დარსაველიზე მოძებნა, რომელმაც შეტევაში ჯ. ხმელიძე ჩართო, მაგრამ მისი დარტყმული მცველებმა დაბლოკეს. პირველი ნახევარი ასეც დასრულდა-1:0. მეორე ტაიმი ანალოგიური სცენარით წარიმართა. ბურთს "სამგურალი" ფლობდა, მაგრამ ჩვენს საჯარიმოსთან მიახლოება და სახიფათო მომენტის შექმნა ძალიან უჭირდა. 52-ე წუთზე სტუმრებმა კარგი შეტევა განახორციელეს, საჯარიმოში შევიდნენ, იქ თავდამსხმელმა სახიფათო მომენტიც შექნა, მაგრამ მსაჯმა მისი მხრიდან წესების დარღვევა დააფიქსირა. 61-ე წუთზე დ. მარგველაშვილმა მოედნის ცენტრში ბურთი აართვა სტუმართა ფეხბურთელს, საჯარიმოს წინ სწრაფად მოძებნა ჯ. ხმელიძე, რომელმაც ერთი შეხებით ბურთის მეკარის თავზე გადაგდება სცადა, მაგრამ გამოცდილმა მეკარე ლ. კუტალაძემ მოახერხა კუთხურზე მოგერიება. 63-ე წუთზე გუნდის კაპიტანმა ნ. გაჩეჩილაძემ ჯარიმა მარჯვენა ფრთიდან საჯარიმოში ჩაჰკიდა. იქ თავით ითამაშა შ. ვარდოსანიძემ, რომლის დარტყმა ოდნავ გადასცდა ხარიხას. 68-ე წუთზე სტუმრებმა მოედნის ცენტრში სწრაფი შეტევა წამოიწყეს და საჯარიმოს გარედან უძლიერესი დარტყმაც განახორციელეს, მაგრამ ნ. ჯოხაძემ აკრობატულ ნახტომში ბურთი კუთხურზე მოიგერია, რომლის გათამაშების შემდეგ წყალტუბოელი ფეხბურთელი თავით ურტყამდა, მაგრამ არაზუსტად. 72-ე წუთზე დ. მარგველაშვილმა მოედნის ცენტრში ბურთი აართვა მეტოქეს, სწრაფად მოძებნა ნ. გაჩეჩილაძე, რომელმაც საჯარიმოში მარჯვენა ფრთიდან კ. გოგობერიშვილი ჩართო, რომელმაც მეტად ხელსაყრელი მდგომარეობიდან გოლის გატანა ვერ მოახერხა. დარჩენილ დროში, ორივე გუნდის დიდი მცდელობის მიუხედავად, ანგარიში აღარ შეცვლილა და ჩვენმა გუნდმა მეტად საჭირო გამარჯვება მოიპოვა: 1-0. შედეგად "მარგვეთმა" პირველი წრე მეორე ადგილზე დაასრულა და მე-4 ადგილზე მყოფ მარტვილის მერანს 6, ხოლო მე-5 ადგილზე მყოფ წყალტუბოს "სამგურალი-2"-ს 10 ქულით უსწრებს. ჩემპიონატში შესვენება გამოცხადდა და მეორე წრე 21 აგვისტოს განახლდება
ზესტაფინის მიხეილს სალაძის სახელობის სპორტულ-გამაჯანსაღებელი მუნიციპალური ცენტრი