"მარგვეთი" წინ მიიწევს

გაიმართა ლიგა-4-ის 27-ე ტურის შეხვედრები. "მარგვეთმა" ხარაგაულში უმასპინძლა ვანის "სულორს." ჩვენმა გუნდმა ლიგა-3-ის საგზური წინა ტურში მოიპოვა. მიუხედავად ამისა, მათ არ უღალატეს სპორტულ პრინციპებს და ბოლომდე თავდაუზოგავად იბრძოლეს. შეხვედრა "მარგვეთის" სათამაშო და ტერიტორიული უპირატესობით წარიმართა და მათივე დამაჯერებელი გამარჯვებით დასრულდა-6:3. მატჩის აღწერით თავს არ შეგაწყენთ, მხოლოდ აღვნიშნავ, რომ სამი ერთმანეთზე ულამაზესი და დიდოსტატური გოლი ჯუმბერ ხმელიძემ გაიტანა. მან თავი მე-9, მე-15 და 38-ე წუთებზე გამოიჩინა და კიდევ უფრო დაწინაურდა ბომბარდირთა დავაში. თითო გოლი 47-ე წუთზე ლევან ლიპარტელიანმა, მე-80 წუთზე ნიკა ხარაიშვილმა და 88-ე წუთზე კობა გოგობერიშვილმა (11 მ-იანი დარტყმით) გაიტანეს. სტუმართა მხრიდან კი თავი თორნიკე ქოქიაშვილმა (43-ე წთ), დუშიკო ტრაპაიძემ (50-ე წთ) და ლაშა ჩავჩიძემ გამოიჩინეს. წარმატებები ვუსურვოთ "მარგვეთს" დარჩენილ შეხვედრებში.